November 30, 2013

பங்கு முதலீடும் பலன்களும் - தி இந்து

பங்கு முதலீடும் பலன்களும் - தி இந்து
உலகத்தில் மதம், இலக்கியத்துக்குப் பிறகு அதிக புத்தகங்களும் கட்டுரை களும் எழுதப்பட்டது பங்கு முதலீடு பற்றிதான் இருக்கும். பங்கு முதலீட்டில் என்ன செய்ய வேண்டும் என்று பலர் எழுதியதைப் படித்து முதலீடு செய்து, நஷ்டம் அடைந்தவர்கள் அதிகம். அதைவிட பங்குச் சந்தையில் என்ன செய்ய வேண்டாம் என்று எழுதினால் நல்லது.
வாழ்க்கையில் எந்த ஒரு செயலையும் முழு புரிதலோடு செய்யுங்கள். இது பங்கு முதலீட்டுக்கு மிக அவசியம். ஒரு பங்கு முதலீட்டில் நஷ்டம் ஏற்பட்டால் அதற்கான காரணங்களை நீங்கள் முழுமையாக தெரிந்திருக்க வேண்டும்.
முகவரின் ஆலோசனையால் எனக்கு நஷ்டம் வந்தது என்று நீங்கள் கூறினால், முகவர்களை மாற்றிக்கொண்டே இருப்பீர்களே தவிர, லாபத்தைப் பார்க்கமாட்டீர்கள். எனவே, பங்குச் சந்தையில் முதலீடு செய்யும்போது, உங்களின் சுய சிந்தனையில் செயல்படுங்கள்.
பங்குகளை எப்படி வாங்குவது, விற்பது என்பது தெரிந்திருக்க வேண்டும். ஒரு பங்கின் விலையை நிர்ணயிக்கும் காரணிகள் என்னென்ன, அவை எப்படி விலையின் போக்கை விளக்குகின்றன என்பது தெரியவேண்டும். ‘Accountancy is the language of business’ என்று பங்குச் சந்தையில் அதிக லாபம் சம்பாதித்த உலகப் பணக்காரர்களில் ஒருவரான Warren Buffett கூறுவார்.
வியாபார நிறுவனங்களின் கணக்கு வைக்கும் முறை, அவர்களின் ஆண்டு அறிக்கை, பொருளாதாரம் என பல செய்திகளை படித்து தெரிந்து முதலீடு செய்ய வேண்டும். இது எதுவுமே எனக்குத் தெரியாது, புரியாது என்றால், நீங்கள் நல்ல வியாபாரி இல்லை. எனவே, பங்குச் சந்தையை மறந்துவிடுங்கள்.
ஒரு சாதாரண முதலீட்டாளர் நீங்கள். உங்களுக்கும் பங்குச் சந்தைக்கும் இடையே ஒரு முகவர் தேவை. உங்கள் முகவர் நேர்மையானவராக இருக்க வேண்டும். அதேபோல் ஒரு நிறுவனம் நேர்மையாக நடத்தப்படவில்லை என்றால் நிச்சயமாக அது ஒரு நாள் கீழே விழும். அப்படிப்பட்ட நிறுவன பங்கினை வாங்காமல் இருப்பது நல்லது.
குறுகிய காலத்தில் பெரிய லாபத்தை எதிர்பார்த்து பங்கு முதலீடு செய்யாதீர்கள். ஒரு பங்கின் விலை குறுகிய காலத்தில் அதிகமாக உயர்கிறது என்றால், அது கீழே விழ அதிக நேரம் பிடிப்பதில்லை. சிறிய லாபம், நீண்ட காலத்துக்கு தொடர்ந்தால், உங்கள் செல்வம் பன்மடங்கு அதிகரிக்கும்.
பிரச்சினைகளில் இருந்து வெளியே வருவது கடினம். அதைவிட பிரச்சினைக்குள் மாட்டிக் கொள்ளாமல் இருப்பது நல்லது. எனவே, கடன் வாங்கி பங்குச் சந்தையில் முதலீடு செய்யாமல் இருங்கள். அவசியத் தேவைக்காக இருக்கும் பணத்தை, அத்தேவை ஏற்படும் வரை சிறிது காலத்துக்கு பங்கில் முதலீடு செய்து வைக்கலாமே என்ற ஆசை உங்களுக்கு வரவே கூடாது.

ஏன் வேண்டும் பான் கார்டு? - தி இந்து

கருப்புப் பணத்தை ஒழிப்பது பற்றி அதிகம் பேசுவது நடுத்தர மக்கள்தான். லஞ்சம், கணக்கில் வராத வருவாய் இவையே கருப்புப் பணத்தின் ஊற்றுக்கண்கள். இந்தப் பிரச்சினையை முற்றிலும் தடுக்க இயலாது எனினும் படிப்படியாக குறைக்க முடியும்.
இரண்டு வழிகளில் கருப்புப் பண பயன்பாட்டைக் குறைக்கலாம். ஒன்று, குறிப்பிட்டத் தொகைக்கு மேல் கொண்ட எல்லா பரிவர்த்தனைகளையும் Electronic payment மூலம் செய்ய வைக்கலாம்.
அதாவது, கிரெடிட் அல்லது டெபிட் கார்டுகளைப் பயன்படுத்துதல். அதனுடன் பான் கார்டு எண் குறிப்பிடுவதைக் கட்டாயமாக்குதல். அப்படிச் செய்தால் நமது அனைத்து பரிவர்த்தனைகளும் பான் கார்டு எண் மூலம் வருமான வரித் துறையால் கண்காணிக்கப்படும்.
அவ்வாறு கண்காணிக்கப்படும்போது, ஓர் ஆண்டில் நாம் செய்யும் செலவுகள், நாம் செலுத்தும் வருமான வரியைவிட அதிகமாக இருக்கிறது என்றால், கூடுதல் வரி செலுத்த வேண்டி வரும். இதற்கான விசாரணைகளில் கணக்கில் வராத வருவாய்களைக் கண்டறிவதன் மூலம் கருப்புப் பணம் களையப்படும்.
சரி, யாரெல்லாம் பான் கார்டு வாங்க வேண்டும்? ஆண்டுக்கு சராசரியாக இரண்டு லட்சம் ரூபாய்க்கு மேல் வருமானம் கொண்டவர்கள் வருமான வரி செலுத்த வேண்டும். அவர்களுக்கு பான் கார்டு அவசியம். மேலும் 50 ஆயிரம் ரூபாய்க்கு மேல் வங்கிகளில் செலுத்தவோ எடுக்கவோ பான் கார்டு எண் கொடுக்க வேண்டும். பான் கார்டு இல்லாதவர்கள், தனக்கு வருமான வரி கட்டும் அளவுக்கு வருமானம் இல்லை அல்லது வரியை நானே கட்டிவிடுவேன் என்று உறுதி அளிக்க வேண்டும். இதற்கு சில படிவங்கள் வங்கிகளில் இருக்கும். அதைப் பூர்த்தி செய்து கொடுக்க வேண்டும்.
அது மட்டுமில்லாமல் வாகனம், நிலம், வீடு போன்ற மதிப்புள்ள பொருட்களை வாங்கும்போதும் பான் கார்டு எண் அவசியம். தவிர, அரசு வேறு எதற்கெல்லாம் பான் கார்டு எண்ணைக் குறிப்பிட வலியுறுத்துகிறதோ அற்கெல்லாம் கொடுக்க வேண்டும்.
அதே நேரத்தில் ஒருவர் பான் கார்டு வாங்கியதாலேயே அவர் வருமான வரி கட்ட வேண்டும் என்ற அவசியம் இல்லை. வருமானம் குறிப்பிட்ட அளவைத் தாண்டும்போதுதான் வரி கட்ட வேண்டும். பான் கார்டு வைத்திருப்பதில் ஒரு நன்மை உண்டு. அதை அனைத்து அரசு மற்றும் அரசு சாராத நிறுவனங்களில் உங்கள் அடையாள அட்டையாகப் பயன்படுத்தலாம்.
பான் கார்டு வாங்குவதும் மிக எளிது. புகைப்படத்துடன் கூடிய அடையாளச் சான்று, முகவரிச் சான்று இருந்தாலே போதுமானது. இதற்கு 106ரூபாய் வரை செலவாகும். இதற்கான முகவர்கள் எல்லா ஊர்களிலும் உள்ளனர்.

November 20, 2013

சீட்டாட்டம் அல்ல.. சீட்டு சேமிப்பு! - தி இந்து

எனக்குத் தெரிந்து முறையற்ற நிறுவனங்களிடம் சீட்டு கட்டி ஏமாறுபவர்கள்தான் அதிகம். சீட்டு கட்டுவது மட்டுமல்ல.. பாத்திரத்துக்கு, தங்கத்துக்கு, வீட்டு மனைக்கு, வீட்டு உபயோகப் பொருட்களுக்கு என பல வழிகளிலும் சிறுகச் சிறுக சேமிக்க நினைக்கும் வருமானம் குறைந்த மற்றும் நடுத்தர வர்க்கத்தினர் ஏமாற்றப்படுகிறார்கள். இப்படி செய்திகள் தினமும் வருகின்றன. சமீபத்தில் நடந்த ஒரு கருத்துக் கணிப்பில் சிறு நகரங்களிலும் கிராமங்களிலும் மக்கள் இன்னும் சீட்டு கட்டுவதே சிறந்த சேமிப்பு, முதலீடு என்று நம்புவதாகக் கூறப்பட்டுள்ளது.
சீட்டு நிறுவனம் நடத்துவது தவறான செயல் அல்ல. ஆனால், அதிக வட்டி தருவதாக வைப்புநிதி பெறுவதும் போதிய நிதி பின்புலம் இல்லாமல் அந்நிறுவனத்தை நடத்துவதும் நிதியை வேறு நிறுவனங்களுக்கு மாற்றுவதும் முறையற்ற நிதி செயல்பாடுகள். இதைத் தடுப்பது மாநில அரசுகளின் கடமை என்கிறது இந்திய ரிசர்வ் வங்கி.
ஒரு சீட்டு நிறுவனத்தை நடத்துபவர் மற்றும் சீட்டு கட்டும் மற்ற உறுப்பினர்களின் நம்பகத்தன்மைதான் அந்நிறுவனத் தின் செயல்திறனை மேம்படுத்தும். ஒழுங்குபடுத்தப்படாத சீட்டு நிறுவனங்களில் இந்த நம்பகத்தன்மையை எதிர்பார்ப்பது இயலாத காரியம். அதனால், தீர விசாரித்து அதுபோன்ற நிறுவனங்களில் முதலீடு செய்வதைத் தவிர்த்துவிடுங்கள்.
முறையற்ற சீட்டு நிறுவனங்களில் அதிக வட்டி கிடைக்கவேண்டும் எனில், முதலில் சீட்டு எடுப்பவர்கள் அதிக தொகையைத் தள்ளி எடுக்க வேண்டும். அப்படி எடுப்பவர்கள் அதை திருப்பிக் கட்டுவதும் சிரமம். ஏமாற்றமே மிஞ்சும்.
ஒழுங்குபடுத்தப்படாத சீட்டு நிறுவனங்களில் வருமான வரி கட்டுவது தொடர்பான எவ்வித கேள்விகளும் கேட்காமல் இருப்பதால் பலர் அங்கு செல்கிறார்கள். உண்மையில் வரி கட்டுவதுதான் பல நேரங்களில் உங்களை இதுபோன்ற சிக்கல்களில் இருந்து காப்பாற்றும். ஏனெனில், வரி கட்டும் நிறு வனங்கள் எப்போதும் அரசின் கண்காணிப்பிலேயே இருக்கும். எனவே, வரி கட்டுகிற நிறுவனங்களைத் தேடுங்கள்.
மத்திய அரசின் Chit Funds Act 1982, தமிழக அரசின் TamilNadu Chit Funds Act 1961 ஆகிய சட்டங்களின் கீழ் உரு வாக்கப்பட்ட நடைமுறை விதிகள் மூலமாக சீட்டு நிறுவனங் கள் ஒழுங்குபடுத்தப்படுகின்றன. Chit Vigilance Cell என்ற அமைப்பும் செயல்படுகிறது. இது சீட்டு நிறுவனங்களில் உள்ள விதிமீறல்களைக் கண்காணித்து நடவடிக்கை எடுக்க வேண்டும். ஆனால், இந்த அமைப்பு ஒரு நிறுவனத்தின் மீது புகார் வந்த பிறகே செயல்படுவதாகவும் குற்றச்சாட்டு உண்டு.
மேலும், இவ்வாறான நிதி மோசடிகளுக்கு அடிப்படைக் காரணம், இங்கு எல்லோரும் எளிய வழிகளில் பணம் கடன் வாங்கவும் சேமிப்பு செய்யவும் வசதிகள் குறைவு. ஏழைகளின் தேவைக்கு ஏற்ப அவர்களது பொருளாதார சூழலைப் புரிந்து கொண்டு கடன் அளிக்கவும் அவர்களது சேமிப்பைத் திரட்டவும் ஒரு புதிய நிதி அமைப்பு தேவை. சுயஉதவிக் குழுக்கள் ஓரள வுக்கு இந்த வேலைகளைச் செய்தாலும், அவற்றின் செயல்பாடுகள் இன்னும் விரிவடையவும் மேம்படவும் முயற்சிகள் தேவை.
இன்னொரு பக்கம் வங்கிகளின் சேவைகள் அதிகரிக்கப்பட வேண்டும். 120 கோடிக்கு மேல் மக்கள்தொகை கொண்ட நாட்டில் ஒரு லட்சத்துக்கும் குறைவான வங்கிக் கிளைகளே உள்ளன. அதாவது, 12 ஆயிரம் பேருக்கு ஒரு வங்கிக் கிளை. கிராமங்களில் வங்கிக் கிளைகளின் எண்ணிக்கை மேலும் குறைவு. அதனால், மக்கள் தங்களைத் தாங்களே காத்துக்கொள்வதே சிறந்தது. முறைப்படுத்தப்பட்ட சீட்டு நிறுவனங்களிடம் செல்லுங்கள். உங்களுடன் சீட்டு கட்டும் மற்ற உறுப்பினர்களை தெரிந்துகொள்ளுங்கள். சீட்டு எடுத்த பணத்தை அரசு வங்கியில் வைப்புத் தொகையாக சேமியுங்கள். சீட்டு நிறுவனத்தின் வருடாந்திர அறிக்கையை வாங்கிப் படியுங்கள். எந்த குறை என்றாலும் Registrar of Chits, Chits Vigilance Committee ஆகியோரை அணுகுங்கள். பாதுகாப்பான சேமிப்பே உங்கள் பக்க பலம்!

November 04, 2013

'இயற்கையோடு இணைந்து இன்பமாய் வாழ்கிறோம்' - தி இந்து

காலை இஞ்சி.. கடும்பகல் சுக்கு.. மாலை கடுக்காய்.. மண்டலம் உண்டோர் கோல் இன்றி நடப்பாரே - இதுதானே பண்டைத் தமிழரின் வாழ்வியல் உணவு முறை” என முண்டாசை சரிசெய்தபடி மீசையை முறுக்குகிறார் முத்துச்சாமி. 75 வயதானாலும் 25 வயது இளைஞனிடம் இல்லாத சுறுசுறுப்பை இவரிடம் பார்க்கலாம்.
திருப்பூர் கருவம்பாளையம் பகுதியில் உள்ள முத்துச்சாமியின் வீடு இந்தத் தலைமுறை நிச்சயம் காணவேண்டிய ஒரு அருங்காட்சியகம். சாணம் மெழுகிய திண்ணைகள், கயிற்றுக்கட்டில், பனை ஓலை விசிறி, சீமை ஓட்டு மேல்கூரை, பொன்னாங்கண்ணி, வில்வம், கத்தாழை, தூதுவளை, புதினாவுடன் கூடிய மூலிகைத் தோட்டம், தினசரி சாப்பாட்டுக்காக மாடியில் காய்கறித் தோட்டம், அதன் பக்கத்தில் அறிவை மேம்படுத்தும் பெரிய நூலகம்.. என்று இயற்கையோடு இயைந்து, இணைந்து வாழ்கிறார் முத்துச்சாமி. அக்கம்பக்கத்தில் வசிப்பவர்கள் அவரது வாழ்க்கை முறையைப் பார்த்து வாயைப் பிளக்கிறார்கள்.
"எல்லாரும் எல்லாமும் பெறவேண்டும் என்பதுதான் நான் வாழும் இந்த வாழ்க்கையின் உண்மை தத்துவம். தமிழகத்தின் தேசிய மரம் பனை. ஆனால், கொஞ்சம்கூட யோசிக்காம அதை அழிச்சிட்டு வர்றாங்க. செங்கல் சூளைக்காக பனை மரத்தை தூரோடு வெட்டி எடுத்துட்டே இருக்காங்க. பனைப்பால், பனை நுங்கு, பனை ஓலை, கருப்பட்டி என வாழைக் கன்றுபோல பனையின் அனைத்து பாகங்களும் பயன்படும். பனையின் முக்கியத்துவத்தை வலியுறுத்தி, ஒரு குறளுக்கு 100 மரம் வீதம் ஒரு லட்சத்து 33 ஆயிரம் பனை மரங்களை திருப்பூர், காங்கயம், சென்னிமலை, கைத்தமலை, ஜல்லிப்பட்டி, செஞ்சேரிமலை, நரசிபுரம், பவானி உள்ளிட்ட பகுதிகளில் நட்டுவைத்தோம். ஆனாலும், பனை மரங்களை அழிப்பது நின்றபாடில்லை” - இயற்கையின் மீது தனக்குள்ள அக்கறையை வெளிப்படுத்திய முத்துச்சாமி, தன்னைப் பற்றியும் பேசினார்.
"வருஷா வருஷம் முதியோர் தடகளப் போட்டியில் எனக்குதான் முதலிடம். அந்தளவுக்கு என் மனசையும் உடம்பையும் இயற்கை உணவு காப்பாத்தி வைச்சுருக்கு. இதுவரை எந்த நோயும் அண்டியதில்லை. காலையில் வரகரிசி உப்புமா, கொஞ்சம் கீரை, அரை வேக்காட்டில் காய்கறிகள், மூலிகை தோசை, ராகி, கேப்பை, கம்பு, கூழ்னு எனக்குப் பிடிச்சத எடுத்துக்குவேன். சிறுதானியங்கள் என் உணவுல பிரதான அங்கம். தமிழரின் வாழ்க்கை முறையே அப்படி இருந்ததுதானே. இன்றைக்கு இருப்பதுபோல பளபளக்கும் பகட்டு டப்பாக்களுக்குள் நம் முன்னோர்கள் முடங்கிப் போகவில்லையே?
வீட்டில் சமையலுக்குகூட, கடைகளில் அரைத்து விற்கப்படும் எந்தவொரு பொருளையும் நாங்க பயன்படுத்துறதில்லை. மூணு வேளையும் முழு கட்டு கட்டுற வேலையும் எனக்குப் பிடிக்காது. காலை மற்றும் பொழுதுசாயும் நேரம் என தினமும் ரெண்டு வேளைதான் சாப்பாடு. மத்த நேரங்களில் சுக்கு கசாயம் போதும். வெளியூர் போனா ஓட்டலைத் தேடிப் போறதில்லை. அதுக்குப் பதிலா, கொஞ்சூண்டு அவல் எடுத்துட்டுப் போயிருவேன். ஒருவேளை பசியாற மூணு கைப்பிடி அவல் போதும். நான் மட்டுமல்ல.. சுப்புலட்சுமியும் அப்படித்தான்” என்று தன் மனைவியை அறிமுகப்படுத்துகிறார்.
"எந்தச் சூழலிலும் இயற்கைக்கு முரணா வாழக்கூடாதுன்னு இவரு அடிக்கடி சொல்வாரு. செல்போன் அதிகரிச்சதால சிட்டுக்குருவிகள் அழிஞ்சுட்டு இருக்கு, அதனால செல்போனை நாங்க கையால தொடுறதே இல்லை. பெட்ரோலுக்குத்தானே இந்த உலகத்துல பெரும் யுத்தம் நடக்குது. பெட்ரோல் வண்டிகளோட கரும் புகை நம்மைச் சுற்றி நச்சுக்களை பரப்பி இயற்கையை அழிச்சுக்கிட்டே இருக்கு. அதனால, பெட்ரோல் பயன்படுத்தவே கூடாதுன்னு வைராக்கியம் வச்சுக்கிட்டு, இப்ப வரைக்கும் சைக்கிள்தான் ஓட்டுறாரு.
அளவுக்கு அதிகமாக தண்ணீரை வீணடிக்கிறதும் நாம பூமிக்கு செய்யுற துரோகம்னு சொல்வாரு. வீட்டுல மின்சார வசதிகூட ரொம்ப நாளா இல்லை. இப்பத்தான் சோலார் பேனல் மூலமா ஒரே ஒரு லைட்டுக்கும், காத்தாடிக்கும் தேவையான அளவுக்கு இயற்கை மின்சாரம் உபயோகிக்கிறோம். இவரு வெளியூர்களுக்கு போனாக்கூட கீழாநெல்லி, துளசி மாதிரியான கன்றுகளைத்தான் வாங்கிட்டு வருவாரு. நாங்க, முடிஞ்ச வரைக்கும் இயற்கையை சீரழிக்காம வாழ்ந்துட்டு இருக்கோம். அதனால, எங்க வாழ்க்கையும் ரொம்ப ஆரோக்கியமாக இருக்கு. ஆனா, தங்களையும் அறியாமல் இயற்கையை அழிச்சிட்டு இருக்கிற சனங்க, 'எப்படி உங்களால இந்தக் காலத்துலயும் இப்படி எல்லாம் வாழமுடியுது. இந்தக் காலத்துக்கு இதெல்லாம் சரிப்பட்டு வருமா?'ன்னு கேள்வி கேக்குறப்ப சிரிக்கிறதா வேதனைப்படுறதான்னு தெரியல” கணவர் கருத்திலிருந்து கடுகளவும் மாறாமல் பேசினார் சுப்புலட்சுமி.
'அரசு விழாக்களில் புலால் உணவு பயன்படுத்த தடைவிதிக்க வேண்டும்' என முத்துச்சாமி எழுதிய கோரிக்கை மனுவை ஏற்றுத்தான், 'இனி, அரசு விழாக்களில் சைவ உணவு மட்டுமே பரிமாறப்படும்'என்ற உத்தரவை தமிழக அரசு பிறப்பித்ததாம். பெருமையுடன் சொல்கிறார் முத்துச்சாமி.
இயற்கையோடு இணைந்த இவர்களது வாழ்க்கைமுறை பற்றி கேள்விப்பட்டு, இந்தக் காலத்து இளைஞர்கள் பலரும் இவர்களது வீட்டுக்கு வந்து விசாரித்துவிட்டுப் போகிறார்களாம். இவர்களில் பலர், 'நாங்களும் உங்களைப் போல இயற்கைக்கு மாறிட்டோம் ஐயா' என்று சொல்ல ஆரம்பித்திருப்பது முத்துச்சாமியின் இயற்கை வாழ்வியல் முறைக்கு கிடைத்த இன்னொரு வெற்றி!

மரம் தந்த மாறன் - தி இந்து

மன்னார்குடியைச் சேர்ந்த பேராசிரியர் மாறனிடம் பேச ஆரம்பித்தால், அவரது பேச்சு முழுக்க மரங்களே நிறைந்திருக்கின்றன. அவை பேச்சின் எல்லா திசைகளிலும் கிளை பரப்பி நிற்கின்றன.
"என்னுடைய சின்ன வயதில் எங்கள் குடும்பத்துக்கு மாந்தோப்பும், தேக்கு, வேம்பு நிரம்பிய மற்றொரு தோப்பும் இருந்தன. ஆனால் குடும்பச் சூழ்நிலையால் தோப்பை விற்க வேண்டியதானது. மாந்தோப்பு வறட்சியால் முற்றிலும் பட்டுப் போனது. இந்தத் தோப்புகள் என் மனதில் பெரிய வெற்றிடத்தை ஏற்படுத்திவிட்டன.
அது மட்டுமில்லாமல் சின்ன வயசில் நண்பர்களுடன் இந்தத் தோப்புகளில்தான் எப்போதும் கிடப்பேன். என் குழந்தைகளுக்கும், மற்ற குழந்தைகளுக்கும் அப்படிப்பட்ட வாய்ப்பு கிடைக்கவில்லையே என்று நினைத்தேன். அவர்களுக்காகவே மரங்களை வளர்க்கும் ஆர்வம் தீவிரமடைந்தது" என்கிறார் மன்னார்குடி எம்.ஆர். அரசு கலை அறிவியல் கல்லூரியின் ஆங்கிலத் துறைத் தலைவராக பணியாற்றிவரும் மாறன். மரம் வளர்ப்பது மீதான இந்தக் காதல் 10 ஆண்டுகளுக்கு முன்னர் அவருக்குள் துளிர்த்திருக்கிறது.
"எங்களுடைய கல்லூரியில் படித்த ஒரு மாணவியின் தந்தை வனத்துறையில் வேலை பார்த்தார். அவரது உதவியுடன் வேங்கை, செஞ்சந்தனம், நீர்மருது, இருவாச்சி, பெருநெல்லி என நான் பரிந்துரைத்த மரங்களை எங்கள் கல்லூரியில் நட்டார்கள். மரங்களை நட ஆரம்பித்த காலத்தில் எங்கள் கல்லூரி வெறிச்சென்றுதான் இருந்தது. இப்போது சிறிய காட்டைப் போலிருக்கிறது.
இந்த அனுபவத்துக்குப் பிறகு மகிழ மரங்கள் மீது தீவிர ஆர்வம் எழுந்தது. நம் நாட்டில் வாழ்ந்த வெள்ளைக்காரர்களுக்கு மகிழ மரம் ரொம்பப் பிடித்தமான மரம். பழைய ஆர்.டி.ஓ. அலுவலகம், நீதிமன்றம், காவல் நிலையங்கள், ரயில் நிலையங்களில் அவர்கள் நட்ட பிரம்மாண்ட மகிழ மரங்கள் நிற்பதே இதற்கு சாட்சி. மகிழ மரத்தை அவர்கள் விரும்பி நட்டதற்கு முக்கியக் காரணம், அது ஆண்டு முழுவதும் இலை உதிர்க்காத மரம் என்பதுதான். நம் நாட்டு மரங்களான புங்கன், வேப்ப மரங்கள்கூட ஆண்டின் குறிப்பிட்ட காலத்தில் இலைகளை உதிர்த்துவிடும். ஆனால், மகிழம் ஆண்டு முழுவதும் இலை உதிர்க்காது.
மகிழ மரத்தின் அடியில் சென்று பார்த்தால், அடியில் ஒரு சிறிய இடைவெளியில்கூட வானத்தைப் பார்க்க முடியாது. சூரிய ஒளி நுழைய முடியாத அளவுக்கு இலைகள் அடர்த்தியாக வளர்ந்திருக்கும். அதன் நிழலில் படுத்துத் தூங்கலாம். 50 ஆண்டுகளுக்கு முன் தமிழகத்தில் மகிழ மரங்கள் பரவலாக வளர்க்கப்பட்டிருக்கின்றன. இப்போது மகிழ மரங்களை தேடிப் பிடிக்க வேண்டியிருக்கிறது.
மகிழ மரத்தை பலரும் வளர்க்க விரும்பாததற்குக் காரணம், அது மெதுவாக வளரும் தன்மை கொண்ட மரம் என்பதுதான். மகிழ மரத்தின் பழங்களைச் சாப்பிடலாம் என்பது பலருக்குத் தெரியாது. தோல் பராமரிப்புக்குப் பயன்படுத்தலாம். மருத்துவ குணங்கள் கொண்ட அப்பழங்கள், அழகுப் பொருள் தயாரிப்பில் பயன்படுத்தப்படுகின்றன.
என் வீட்டு வாசலில் 2, என் வீட்டுக்கு எதிரே உள்ள வீரன் கோவிலில் 2, கல்லூரியில் 1 என ஐந்து மகிழ மரங்களை வளர்த்திருக்கிறேன். ஒவ்வொரு வருஷமும் என் துறையில் படித்து முடிக்கும் 40 மாணவர்களுக்கு மகிழ மரக்கன்றுகளைக் கொடுப்பதை வழக்கமாக வைத்திருக்கிறேன். எல்லா மாணவர்களும் மரங்களை வளர்க்க வாய்ப்பில்லை என்றாலும், ஒரு சிலராவது நிச்சயம் வளர்ப்பார்கள்.
எனது பேராசிரியர் தங்க.ஜெயராமனின் வலியுறுத்தலின்படி சமீபகாலமாக செண்பக மரக்கன்றுகளையும் இப்படிக் கொடுக்க ஆரம்பித்திருக்கிறேன். செண்பக மரங்கள் பெருகி இருந்ததால், மன்னார்குடி செண்பக ஆரண்ய சேத்திரம் என்று ஒரு காலத்தில் அழைக்கப்பட்டதை அவர் சுட்டிக்காட்டுவார். இன்றைக்கு மன்னார்குடி ராஜகோபால சாமி கோவிலில் செண்பக மரங்கள் 2 இருக்கின்றன.
மீண்டும் சந்திக்கும்போது என் மாணவர்கள், தாங்கள் வளர்க்கும் மரக்கன்றுகளைப் பற்றிச் சொல்வார்கள். பலரும் எனது மரக் காதலைப் பார்த்துவிட்டு, என்னிடம் மரக்கன்றுகளைக் கேட்பார்கள். சிலர் திருமணங்களில் விருந்தினர்களுக்கு பரிசாக அளிக்கவும் மரக்கன்றுகளை கேட்பார்கள். எல்லோருக்கும் வாங்கித் தருகிறேன்.
என்னுடைய புதிய வீடு மன்னார்குடி-பட்டுக்கோட்டை சாலையில் சுந்தரக்கோட்டை என்னும் இடத்தில் உள்ளது. 2 ஏக்கர் பரப்பு கொண்ட இந்த வீட்டைச் சுற்றி மாவில் 8 வகை, கொய்யாவில் 10 வகை, சப்போட்டா, ஆரஞ்சு, நாரத்தை, பலா என 50க்கும் மேற்பட்ட வகைகளில் மரக்கன்றுகளை வளர்த்திருக்கிறேன்.
என் வீட்டுக்கு எதிரே ஒரு வீரன் கோவிலும், அதற்குரிய 1 ஏக்கர் நிலமும் பராமரிப்பில்லாமல் இருந்தன. அந்த நிலத்தில் செண்பகம், வன்னி, நாகலிங்கம், வில்வம், ஆல், அரசு போன்ற நம் நாட்டு மரக்கன்றுகளையும், இலுப்பை, புன்னை போன்ற பசுமைமாறாத் தாவரங்கள், குதிரைக்காய் மரம் என்றொரு பிரம்மாண்ட மரம் உள்ளிட்டவற்றை வளர்த்துவருகிறோம்" என்று சொல்லும் மாறனின் குடும்பத்தினர்தான், மரக் கன்றுகளை வாங்குவது, தண்ணீர் விடுவதற்கான குழாய், பராமரிப்புச் செலவுகள், பராமரிப்புப் பணிகள் போன்ற அனைத்தையும் பகிர்ந்து செய்துவருகிறார்கள்.
பேராசிரியர் மாறன், மரங்களுடன் மரங்களாக இப்படி ஒன்றிப் போவதற்குக் காரணம் மன்னார்குடி அரசு மருத்துவமனைக்கு எதிரே பெட்டிக்கடை வைத்திருக்கும் ஒரு பெரியவர்தானாம். மன்னார்குடியின் பல பகுதிகளுக்கு மரக்கன்றுகளை எடுத்துச் சென்று நட்டு, சுற்றிலும் கருவேல முட்களால் வேலி அமைத்து, தினசரி சைக்கிளில் குடங்களைக் கட்டி தண்ணீர் எடுத்துப் போய் ஊற்றுவது அந்தப் பெரியவரின் வழக்கம்.
"மரம் வளர்ப்பதை தவம் போலச் செய்ய வேண்டும் என்ற உத்வேகம் அவரிடம் இருந்தே எனக்குக் கிடைத்தது. என் கல்லூரியில் நான் வளர்த்த பல மரங்கள், 1 மாடி, 2 மாடிகளைக் கடந்து வளர்ந்துவிட்டதைப் பார்க்கும்போது என் மனசு குதூகலிக்கிறது" என்று கூறும் பேராசிரியர் மாறனைப் பார்க்கும்போது, அவர் மனதுக்குள் விதைக்கப்பட்ட விதைகள் ஆழ வேரூன்றியிருப்பது தெரிகிறது.
மகிழம்
மகிழ மரத்தின் பழைய தமிழ்ப் பெயர் வகுளம். மகிழ் என்றும் அழைக்கப்படுகிறது. அறிவியல் பெயர் Mimusops elengi (L.) ஆங்கிலத்தில் Bullet wood, Indian Medlar, Spanish Cherry. இது சப்போட்டா குடும்பத்தைச் சேர்ந்த பசுமைமாறாத் தாவரம். இலைகள், மலர்கள் சப்போட்டாவை ஒத்திருக்கும், பழங்கள் மஞ்சளாக ஒட்டும்தன்மையுடன் இருக்கும். இவற்றைச் சாப்பிடலாம். இந்தியா, பசிஃபிக், ஆஸ்திரேலியா நாடுகளில் இயல்பாக வளரக்கூடியது. எண்ணெய் போன்ற நறுமணப் பொருளைத் தரும். இந்த மரம் ரொம்பவும் உறுதியானது, கடினமானது, மதிப்புமிக்கது. அதன் காரணமாகத்தான் ஆங்கிலத்தில் "புல்லட் உட்" என்ற பெயர் இதற்கு வந்தது. இந்த மரத்துக்கு பாலிஷ் போட்டால் அடர்சிவப்பாக இருக்கும்.

என்.ஆர். ஐ-களுக்கு ஏற்ற முதலீட்டு வாய்ப்புகள் - தி இந்து

சென்றவாரம் எஃப்.சி.என்.ஆர் (பி) [FCNR (B)] கணக்குகள் குறித்துப் பார்த்தோம். இவ்வாரம் என்.ஆர்.ஐ-களுக்கு உள்ள வெவ்வேறு முதலீட்டு வாய்ப்புகள் குறித்துப் பார்ப்போம்.
வெளிநாட்டு வாழ் இந்தியர் கீழ்க்கண்ட முதலீட்டு சாதனங்க ளில் வரையறையின்றி முதலீடு செய்து, தேவைப்படும் பொழுது தான் வாழும் நாட்டிற்கு எடுத்துச் செல்லலாம்.
1. அரசாங்க கடன் பத்திரங்கள்
2. மியூச்சுவல் ஃபண்டு யூனிட்டு கள்
3. பொதுத்துறை நிறுவனங்கள் வெளியிடும் கடன் பத்திரங்கள்
4. கம்பெனிகள் வெளியிடும் என்.சி.டி-க்கள் (NCD Non-Convertible Debentures)
5. வங்கிகள் வெளியிடும் கடன் சார்ந்த உபகரணங்கள்
6. பொதுத்துறை நிறுவனப் பங்குகள்
7. அந்நிய நேரடி முதலீட்டு (FDI Foreign Direct Investment) முறை மூலம் கம்பெனி பங்குகள் மற்றும் மாற்றக்கூடிய கடன் பத்திரங்கள் (CONVERTIBLE DEBENTURES) மற்றும் இந்திய பங்குச் சந்தையில் வர்த்தகமாகும் பங்குகள்
என்.ஆர்.ஐ.க்கள் கீழ்க்கண்ட முதலீடுகளில் திரும்ப தான் வாழும் நாட்டிற்கு எடுத்துச் செல்ல முடியாத (NON-REPATRIATION) முறையில் வரையறையின்றி முதலீடு செய்யலாம்.
1. அரசாங்க பத்திரங்கள்
2. மியூசுவல் ஃபண்டு யூனிட்டுகள்
3. மணி மார்க்கட் மியூசுவல் ஃபண்டு யூனிட்டுகள்
4. தேசிய சேமிப்பு பத்திரங்கள்
5. என்.சி.டி-க்கள்
6. பங்குச் சந்தைகள் மூலமாக பங்குகள் மற்றும் மாற்றிக் கொள்ளக்கூடிய கடன் பத்திரங்கள் (CONVERTIBLE DEBENTURES)
7. பங்குச் சந்தைகளில் வர்த்தக மாகும் டெரிவேடிவ் காண்ட்ராக் டுகள்
இவற்றில் எல்லாம் முதலீடு செய்ய முடிந்த பொழுதிலும், வெளிநாடு வாழ் இந்தியர்கள் பி.பி.எஃப் (PPF) என்று அழைக்கப்படும் மிகவும் பாபுலரான பப்ளிக் பிராவிடண்ட் ஃபண்டில் முதலீடு செய்ய முடியாது என்பது குறிப்பிடத்தக்கது.
சென்ற வாரம் பார்த்தது போல், வெளிநாட்டு வாழ் இந்தியர்களுக்கு அடிக்கடி ஏற்படும் இன்னும் சில கேள்விகளையும் அதற்கு உண்டான பதில்களையும் கீழே காண்போம்.
1. இந்தியாவில் வசிப்பவர்கள் வெளிநாட்டில் வாழும் அவர்க ளது நெருங்கிய உறவினரை, தங்களது உள்நாட்டில் உள்ள சேமிப்பு கணக்கில் ஜாயிண்ட் அக்கவுண்ட் ஹோல்டராக சேர்த்துக் கொள்ள முடியுமா?
தாராளமாக சேர்த்துக் கொள்ள லாம் முன்னவர் அல்லது இருப்ப வர் (FORMER OR SURVIVOR) என்ற அடிப்படையில் கணக்கைத் திறந்து கொள்ளலாம். ஆனால் வெளிநாட்டு வாழ் உறவினர், உள்நாட்டில் இருப்பவர் உயிரோடு இருக்கும்வரை அந்த கணக்கை ஆப்பரேட் செய்யமுடியாது.
2. உள்நாட்டில் வசிப்பவர் வெளி நாட்டில் வாழும் நெருங்கிய உறவினருக்கு அன்பளிப்பாக பங்குகள், கடன் பத்தி ரங்கள் போன்றவற்றை அளிக்க லாமா?
நன்றாக அன்பளிப்பு கொடுக்கலாம் வருடத்திற்கு 50 ஆயிரம் அமெரிக்க டாலருக்கு மிகாமல் இருக்க வேண்டும்.
3. இந்தியாவில் வாழ்பவர்கள் தங்களது நெருங்கிய வெளி நாட்டு உறவினருக்கு ரூபாயை அன்பளிப்பாக கொடுக்கலாமா?
அன்பளிப்பு கொடுக்கலாம் சில வரையறைகளுக்கு உட்பட்டு. அவ்வாறு கொடுக்கப்படும் அன்பளிப்பு காசோலை மூல மாகவோ அல்லது ஆன்லைன் மூலமாகவோ வருடத்திற்கு 2 லட்சம் அமெரிக்க டாலருக்கு மிகாமல் உறவினரின் என்.ஆர்.ஓ கணக்கிற்கு கொடுக்கப்பட வேண்டும்.
4. உள்நாட்டில் வாழ்பவர்கள் தங்களது நெருங்கிய வெளி நாட்டு உறவினர்களுக்கு எவ்வகையான செலவு களுக்காக பணத்தை கொடுக்கலாம்?
என்.ஆர்.ஐ உறவினர் இந்தியா வரும்பொழுது அவருடைய போக்குவரத்துச் செலவுகள், சாப்பாடு, தங்கும் செலவுகள் மற்றும் மருத்துவச் செலவுகள் போன்றவற்றிற்கு தேவையான பணத்தைக் கொடுக்கலாம்.
வரும் வாரங்களில் என்.ஆர்.ஐ என்பவர் யார், பி.ஐ.ஓ (PIO) என்பவர் யார், நெருங்கிய உறவினர் என்பவர் யார் என்பதைப் பற்றியும், இந்தியாவில் ரியல் எஸ்டேட் முதலீடு பற்றியும் விரிவாகக் காண்போம்.

வாடிக்கையாளர்களைத் தக்கவைக்கும் வித்தகம் - தி இந்து

இதே தேநீர் பிராண்டை அடிக்கடி வாங்குகிறோமே என்ற சலிப்பில் நாம் சிலமுறை வேறு புதிய பிராண்டை வாங்கி சுவைத்துப் பார்த்திருக்கி றோம். ஒரு ஆவலில் வழக்கமாக வாங்கும் ஷாம்ப்பூ பிராண்டிலிருந்து விலகி, புதி தாக வந்துள்ள பிராண்டை வாங்கி, நம் தலை முடிக்கு இது அப்படி என்ன புதிய மாற்றத் தைக் கொடுக்கும் என்று பரிசோதித்துப் பார்த்திருக்கிறோம். இந்த புதிய முயற்சிகள் நமக்கு என்றும் சுவாரசியத்தை அளிக்கும். ஆனால், பிராண்டு களுக்கோ இதுபோன்ற நுகர்வோரின் செயல்கள், ஏகப்பட்ட ஐயங்களை ஏற்படுத்து கிறது -- வாடிக்கையாளர்கள் எவ்வளவு காலம் தங்கள் பிராண்டை உபயோகிப்பார்கள்? எப்போது விலகுவார்கள்? பிராண்டை மாற்றத் தூண்டுபவை எவை? இவ்வினாக்களுக்கு சிரத்தையுடன் விடையறிய முயலும் பிராண்டு களுக்கு வாடிக்கையாளர்களைத் தக்க வைக்கும் பக்குவம் புரிந்துவிடுகிறது.
வாடிக்கையாளர்களை தக்க வைக்க பெரும்பாலான பெரிய விற்பனை அங்காடிகள் பயன்படுத்தும் முறையை நாம் அறிவோம். வாடிக்கையாளர்கள் வாங்கும் தொகைக்கேற்ப புள்ளிகளைக் கொடுத்து, பின்னர் அடுத்த தடவை பொருட்கள் வாங்க வரும்போது அப்புள்ளி களை பணத்தள்ளுபடியாக கழித்துக் கொடுப்பதே இந்த முறை. இது போன்ற அணுகு முறையை பெரிய தங்கும் விடுதிகளிலும், விமானப் பயணச் சேவைகளிலும், வங்கிக் கடன் அட்டைகளிலும் கூட பயன்படுத்துகிறார்கள். ஆனால், பணத்தள்ளுபடியை மட்டுமே குறிக்கோளாகக் கொண்டிருக்கும் எந்த ஒரு திட்டத்தின் மூலமும் பிராண்டுகளுக்கு வாடிக்கையாளர்களுடன் ஒரு ஆரோக்கியமான உறவை ஏற்படுத்த முடியுமா என்பது சந்தேகமே. வீட்டு உபயோக இயந்திரமாகவோ, நவீன தொழில்நுட்பக் கருவியாகவோ, வாகனமாகவோ இருந்தால், விற்பனைக்குப் பின் அளிக்கப்படும் சேவையின் மூலம் ஒரு நல்ல உறவை ஏற்படுத்திக் கொள்ளலாம். கருவிகளின் செயல் பாட்டில் உள்ள குறைகளைக் கேட்டறிந்து சரி செய்து கொடுக்கலாம். அப்படி யென்றால், மக்கள் அன்றாடம் பயன்படுத்தும் பொருட் களை விற்கும் பிராண்டுகளுக்கு, வாடிக்கையாளர்களை தக்க வைப்பது சாத்திய மில்லையா? ஒரு பிராண்டை விட்டு வாடிக்கை யாளர்கள் விலகுவதற்கான தூண்டுகோல்களை ஆராய்ந்து, அதை சரிப்படுத்த முயலும்போது, அது எவ்வகையான பொருளாக இருந்தாலும், அதனை விற்கும் பிராண்டின் மீது ஒரு விசுவாசத்தை ஏற்படுத்த முடியும். இதை ஒரு எளிய உதாரணத்தின் மூலம் விளக்கலாம்.
ஒரு பற்பசை வாங்கும் வாடிக்கையாளருக்கு தான் வாங்கும் பிராண்டே, பல கிளைப்பொருட்க ளின் மூலம் எல்லாவித பற்கள் சம்பந்தப்பட்ட பிரச்சனைகளுக்கும் தீர்வு வழங்கினால், அவர் வேறு பிராண்டுக்கு எதற்கு மாறப்போகிறார்? 1937- லிருந்து இந்தியாவில் விற்கத் துவங்கிய அமெரிக்க பிராண்ட் கோல்கேட் இதைத் தான் செய்கிறது. கோல்கேட் முதலில் ஒரே வகை பற்பசையையும், சில காலத்திற்குப் பின்னர் பற்பொடியையும் மட்டுமே விற்று வந்தது. அப்போதைய தேவை, ஆல மற்றும் வேல மரக்குச்சிகளுக்குப் பதிலாக ஒரு நவீன மாற்றுப் பல்துலக்கும் பொருள், அவ்வளவே! ஆனால், இன்றைய நிலைமையோ வேறு. மக்களுக்கு பற்பசையின் மீது எத்தனையோ எதிர்பார்ப்பு!. எத்தனையோ போட்டி பிராண் டுகள்! இவை அனைத்தையும் சமாளித்து வாடிக்கையாளர்களைத் தன்னுடன் தக்க வைக்க கோல்கேட் பல்வேறு வகையான பற்பசைப் பொருட்களை தொடர்ந்து அளித்து வருகிறது. சற்று அதிக விலை கொடுத்து வாங்கத் தயாராக இருப்போருக்கென்றே, கோல்கேட் விசிபில் வைட் என்ற வெண்மையான பற்களைப் பெற உதவும் பற்பசையையும், கோல்கேட் டோட்டல் என்ற ஈறு சம்பந்தப்பட்ட பிரச்சனைகளை தீர்க்க உதவும் பற்பசையையும், கோல்கேட் சென்சி டிவ் ப்ரோ-ரிலீஃப் என்ற கூசும் பற்களைப் பாதுகாக்க உதவும் பற்பசையையும் தயாரித்து அளிக்கிறது. குறைந்த விலைக்கு பற்பசை வாங்க விரும்புவோருக்கு கோல்கேட் சிபாக்கா மற்றும் கோல்கேட் பற்பொடி ஒரு அடிப்படைப்பொருட்களாக அமைகிறது. கோல்கேட் ஆக்டிவ் சால்ட் கிருமிகளை எதிர்த்து போராடவும், கோல்கேட் ஹெர்பல் இயற்கைப் பொருட்களை விரும்புவோருக்கும், கோல்கேட் டெண்டல் கிரீம் வாய்ச்சொத்தைக்கு தீர்வு காணவும் நடுத்தர விலையில் விற்கப்படும் பொருத்தமான பற்பசைகளாக உள்ளது. கோல்கேட் மேக்ஸ் ஃப்ரஷ் சுவாச மணத்திற்குப் பயன்படுத்தப்படுகிறது. இது தவிர கோல்கேட் கிட்ஸ் குழந்தைகளுக்கும், கோல்கேட் ப்ளேக்ஸ் மவுத் வாஷ், அதிக நேரம் கிருமிகளை எதிர்த்துப் போராடவும் தோதானதாக உள்ளது. மாறும் உணவுப்பழக்கங்களினால் தோன்றும் புதிய பற்கள் சம்பந்தப்பட்ட பிரச்சினைக ளையும், மக்களின் அதிகரிக்கும் ஆரோக்கிய வாழ்க்கைப் பற்றிய கவலையையும் ஈடுகட்ட வேண்டுமானால் இத்தனை வகை யான பற்பசைப் பொருட்களை வழங்கவேண்டு மென்பதை கோல்கேட் புரிந்து கொண்டுள்ளது. இதன் மூலமே கோல்கேட்டால் தன் வாடிக்கை யாளர்களுக்கு, தன்னை விட்டு விலகும் எண்ணம் ஏற்படாமல் செய்ய முடிகிறது.
அறிமுகமான புதிதில் மூன்று சக்கர மிதிவண்டி வாகனத்தின் மூலம் குறை வான பகுதிகளுக்கே சென்றடைந்தது கோல்கேட். பொதுவாக நாம் கேட்கும் பிராண்ட் அருகாமையிலுள்ள கடைகளில் கிடைக்காமல்போனால், அது கிடைக்கும் இடம் தேடி அலைந்து வாங்குவது என்பது இந்த காலத்தில் அரிதானது. நாம் அதற்குப் பதிலாக மாற்றுப் பிராண்டை வாங்கி உபயோகிக்கத் தயங்குவதில்லை. இதை உணர்ந்தே கோல்கேட் நாட்டின் மூலைமுடுக்குகளிலெல்லாம் உள்ள சுமார் 51 லட்சம் கடைகளில் தன் பற்பசைப் பொருட்கள் கிடைக்க வழிவகை செய்துள்ளது. கோல்கேட் பற்பசை கேட்டு, அது இல்லை என்று சொல்லும் கடையைக் காண்பது மிக அரிது!
கோல்கேட் பெரிய ஊடகங்களில் தொடர்ந்து விளம்பரம் செய்தும், ஃபேஸ்புக் போன்ற இணையதள அமைப்பில் கருத்துக் கணிப்பு மூலம் தொடர்பு கொண்டும், மக்களை சென்றடைந்து வருகிறது. ஒரு பிராண்ட் வியாபார நோக்கத்தை மட்டும் அடிப்படை யாகக் கொண்டு செயல்படும்போது, வாடிக்கை யாளர்களுக்கு அதன் மேல் எந்த பற்றும் இல்லாமல் போகிறது. இதைக் கருத்திற் கொண்டே கோல்கேட் ஏகப்பட்ட சமுதாய நலத் திட்டங்களுக்கும் தன்னை அர்ப்பணித்துக் கொண்டுள்ளது. 2012 ஆம் ஆண்டில் சுமார் 25,000 பல்மருத்துவர்களின் துணை கொண்டு கிட்டத்தட்ட 1000 இடங்களில் 40 லட்சம் மக்களுக்கு இலவச மருத்துவ ஆலோசனை வழங்கியுள்ளது. சில தொண்டு நிறுவனங்களோடு சேர்ந்து கொண்டு, படிப்பறிவில்லாத கீழ்த்தட்டு மக்களுக்கு கல்வியறிவையும், எய்ட்ஸ் நோயாளிக் குழந்தைகளுக்கு ஆதரவையும், சில கிராமங்களுக்கு குடிநீர் வசதியையும், சில பள்ளிகளைத் தத்தெடுத்து, அதற்குத் தேவையான உதவிகளையும் கோல்கேட் வழங்கி வருகிறது. பல் மருத்துவம் படிக்கும் மாணவர்களுக்கு கல்வி ஊக்கத்தொகை அளிக்கிறது. இது போன்ற செயல்களினால், பயனடைந்த மக்களிடையே கோல்கேட் பற்றிய பெரிய விழிப்புணர்வும், அதன் மீது ஒரு நன்மதிப்பும் ஏற்பட்டுள்ளது. இத்தகைய செயல்களே பிராண்டுகளுக்கு மக்களுடன் ஒரு உணர்வுப்பூர்வமான பிணைப்பை ஏற்படுத்துகிறது. இந்தியச் சந்தையில் 55 விழுக்காட்டை கைவசம் வைத்துக் கொண்டு, கோல்கேட் முன்னிலையில் இருந்து வருவதே இதற்குச் சான்றாகும். உலகச் சந்தையிலும் 45 விழுக்காட்டை வைத்துக்கொண்டு, கோல்கேட் முன்னிலையிலேயே உள்ளது. இந்தியச் சந்தையில், கோல்கேட்டின் போட்டி யாளர்களிலேயே பெரிய பிராண்ட் 24 விழுக்காட்டை மட்டும் பெற்றுள்ளது. உலகச் சந்தையிலோ கோல்கேட்டுக்கு அடுத்த பெரிய பிராண்ட் 15 விழுக்காட்டை மட்டுமே பெற்றுள்ளது.
கீழ்க்கண்ட திருக்குறள் நமக்கு அவ்வ ளாக பரிச்சயமாகியிருக்காது. ஆனால், வெற்றி யடைந்த பல பிராண்டுகள் இக்குறளை அப்படை யாகக் கொண்டுதான் செயல்படுகிறது.
“வருவிருந்து வைகலும் ஓம்புவான் வாழ்க்கை பருவந்து பாழ்படுதல் இன்று”
இக்குறளின் மூலம் திருவள்ளுவர் அறிவுறுத்துவது என்னவென்றால், தினமும் தம்மிடத்தே வரும் விருந்தினரைப் பாதுகாத்து வாழ்வோரின் வாழ்க்கையில் எந்த துன்பம் வந்தாலும், அது எந்த கேடும் விளைவிக்காது. இதுபோல் தன் பொருட்களை வாங்கி உப யோகிக்கும் வாடிக்கையாளர்களை மகிழ்வித்து தக்க வைத்துக்கொள்ளும் பிராண்டுகள் எந்த இடரையும் சமாளித்து ஜெயிக்கும். தன்னை விட்டு விலகாமல் விசுவாசமாக இருக்கும் ஒவ்வொரு வாடிக்கையாளரும் பிராண்டுகளுக்கு செலவு செய்யாமல் கிடைத்த பெரிய விளம்பரமாகும் உண்மைதானே?

ஆன்மிகத்துக்கு மாறிய நாத்திக கிராமம் - தி இந்து

விழுப்புரத்தை அடுத்த செஞ்சி அருகே உள்ள இந்த கிராமத்தின் பெயர் செக்கடிகுப்பம். கடந்த 40 ஆண்டுகளாக நாத்திக கிராமமாக இருந்த இந்த ஊர், இப்போது திடீரென ஆன்மிகத்துக்கு மாறியுள்ளது.
கோயில் இல்லாத ஊரில் குடியிருக்க வேண்டாம் என்பர். இருப்பினும் சிதிலமடைந்த கோயிலில் இருந்த சிலைகளை சாக்குப்பையில் கட்டி கிணற்றில் வீசி நாத்திகக் கொள்கையில் பற்றுடன் விளங்கியது இந்த கிராமம். ஆன்மிகவாதிகள் அதிருப்தி அடைந்தாலும் திராவிட இயக்கங்கள் அந்த கிராம மக்களுக்கு பக்கபலமாக நின்றன. தை பொங்கலைத் தவிர்த்து வேறு எந்த பண்டிகையும் கொண்டாடாடுவதில்லை. இதைப்பற்றி ஊடகங்கள் பக்கம் பக்கமாக எழுதி தீர்த்தன. கடவுள் நம்பிக்கையற்றவர்கள் வசிக்கும் இந்த கிராமம் தற்போது தலைகீழாக மாறியிருக்கிறது.
அந்த கிராமத்துக்கு ஞாயிற்றுகிழமை சென்றோம். அந்த ஊரில் விநாயகர் சிலை பிரதிஷ்டை செய்யும் நிகழ்ச்சிக்கு ஊராட்சித் தலைவர் தெய்வானை தலைமையில் கிராம மக்கள் திரண்டிருந்தனர். எதனால் இந்த மாற்றம் என கேள்வி எழுப்பியபோது சாமிநாதன் என்ற முதியவரைக் கைகாட்டினர்.
அவர் நம்மிடம் சொன்னது: “எங்க பாப்பாதான் (தங்கை) பவுனு, அதை எங்க ஊரைச்சேர்ந்த அர்சுனன் என்பவருக்கு 40 வருசத்துக்கு முன்னால கல்யாணம் செஞ்சி வச்சோம். அவரு தி.க.காரரு. உடனே எங்க பாப்பா பவுனு பேரை தணியரசுன்னு மாத்திட்டாரு, ஆனா அவரு தன்னோட பேரை மாத்திக்கலே. அதுக்கப்புறம் கொஞ்சம் கொஞ்சமா ஊரை தன்னோட கட்டுப்பாட்டுக்குக் கொண்டு வந்துட்டாரு. அவர் சொல்றதுதான் சட்டம், தர்மம், நியாயம் எல்லாம். அவரை எதிர்த்து பேசியவரை கம்பத்துல கட்டிவச்சி அடிச்சி இருக்காரு, இவரோட காட்டாட்சி பிடிக்காம பல குடும்பங்கள் ஊரை விட்டே ஓடி இருக்காங்க.
இதுக்கு என்னதான் முடிவுன்னு யோசிச்சோம். போன பஞ்சாயத்து தேர்தல்ல எங்க பாப்பா பவுனை கவுன்சிலருக்கு நிக்க வச்சாரு. நாங்க ஒண்ணு சேர்ந்து தோக்கடிச்சோம். ரகசியமா சாமி கும்பிட்ட நாங்க பப்ளிக்கா சாமி கும்பிட முடிவு செஞ்சி மொதல்ல மாரியம்மன் சிலை வைக்கும்போது தகராறு செஞ்சாங்க. அப்ப நடந்த தகராறுல போலீஸ் கேஸாச்சி, கோயில் எடம் சம்மந்தமா சிவில் கேஸ் கோர்ட்ல இருக்கு. ஆனா நாங்க விடறதா இல்ல. அப்புறம் மாரியம்மன் சிலை வச்சோம். இன்னிக்கு பிள்ளையார் சிலை வக்கிறோம்” என்றார்.
இதுதொடர்பாக அர்சுனனிடம் பேசிய போது, “இந்த ஊர்ல கோயில் இருந்ததற் கான ஆதாரமே இல்லை. கோர்ட்ல எங்களுக்கு சாதகமா கேஸ் முடிஞ்சதும் இப்ப கட்டியுள்ள கோயிலை இடிப்போம். அவர்கள் சொல்லும் குற்றச்சாட்டுக்கு ஆதாரம் இல்லை” என்றார்.
40 ஆண்டுகால நாத்திக அடையாளத்தை இந்த கிராமம் இப்போது மாற்றிக்கொண்டது, பகுத்தறிவாளர்களிடையே ஏமாற்றத்தை ஏற்படுத்தியுள்ளது.

அடுக்கடுக்காய்ப் பலன் தரும் கடுக்காய்!



'தாயினும் சிறந்தது கடுக்காய்’ என்கிறது 'பதார்த்த குண சிந்தாமணி’ நூல். 'அடுக்கடுக்காய் வந்த பிணி யாவும் கடுக்காய் கண்டு காணாமல் போகும்’ என்கிறது கிராமத்துச் சொலவடை.

விளையும் இடம், நிறம், வடிவம், அதில் உள்ள டானின் என்ற வேதிப் பொருளின் அளவு என இவற்றின் அடிப்படையில் கடுக்காய் மரத்தில் பல வகைகள் இருக்கின்றன. இது இலை உதிர் வகை மரமாகும். இந்தியாவில் உள்ள மொத்தக் கடுக்காய் மரங்களில் முக்கால் பங்கு மத்தியப் பிரதேசத்தில் இருக்கின்றன. தமிழகத்தில் மேற்குத் தொடர்ச்சி மலைக் காடுகளில் பெரும் அளவு கடுக்காய் மரங்கள் உள்ளன. இதன் இலை கால்நடைத் தீவனமாகவும், இதன் பிசின் கோந்தாகவும் பயன்படுகிறது. மரப் பட்டையில் உள்ள டேனின், தோல் பதனிட உதவும் இயற்கைப் பொருளாகும். பூக்கள் தேன் மிகுதியாகக்கொண்டவை. மரம், கட்டுமானப் பணிகளுக்குப் பயன்படுகிறது.

இந்த மரத்தின் தாவரவியல் பெயர் 'டெர்மினேலியா செபுலா’ (Terminalia chebula). 60 முதல் 75 அடி உயரம் வரை வளரக்கூடியது.

''மருத்துவக் குணங்கள் ஏராளமாக இருப்பதால், 'வைத்தியரின் காதலி’ (பிஷக் ப்ரியா) என்று கொண்டாடப்படுகிறது'' என்கிறார் பாளையங்கோட்டை அரசினர் சித்த மருத்துவக் கல்லூரி உதவி விரிவுரையாளர் ஜெயா எபனேசர்.

கடுக்காய்க் கொட்டையை நீக்கிவிட்டு மீதி உள்ள மேல் தோலை இடித்துச் சலித்து உண்ணலாம். கெட்டிப்படாமல் இருக்க, பசுநெய் சேர்த்துப் பிசைந்துவைக்க வேண்டும். இது ரத்தத்தைத் தூய்மையாக்குகிறது, மலக் கட்டை நீக்கும். வயிற்றில் உள்ள உறுப்புகளை வலுப்படுத்தும். மூளையையும் இதயத்தையும் பலப்படுத்தும். நினைவாற்றலைப் பெருக்கும்.

கடுக்காய்ப் பொடியைத் தேனில் கலந்து ஓர் ஆண்டு முழுவதும் காலைதோறும் சாப்பிட்டுவந்தால், வயோதிகத்தால் வந்த சுருக்கங்களும், முதுமைத்தன்மையும், நரையும் நீங்கும்.

கடுக்காயைத் துவையல் செய்து சாப்பிட்டால், நாக்கு சுவைகளை அறியாமல் இருப்பது தீரும்.

கடுக்காய்ப் பொடியை மூக்கிலிட்டு உறிஞ்சினால், மூக்கில் ரத்தம் வடிவது நிற்கும்.

கடுக்காய்ப் பொடியைக்கொண்டு பல் துலக்கினால், ஈறு வலி குணப்படுவதோடு ஈறில் இருந்து வரும் ரத்தம் நிற்கும்; பல்லும் உறுதியாகும்.

கடுக்காய்ப் பொடியை இரண்டு கிராம் தண்ணீருடன் மாலையில் அருந்திவந்தால், மஞ்சள் காமாலை நோய் நீங்கும். மேலும், ரத்தக் குறைவு, கை கால் எரிச்சல், தோலின் வெண் புள்ளிகள் ஆகியனவும் குணமாகும்.

25 கிராம் கடுக்காய்ப் பொடியில் ஒரு டம்ளர் நீர்விட்டுக் கொதிக்கவைத்து 50 மி.லி-யாக வற்றவைத்துப் பருகினால், கண் நோய், சர்க்கரை நோய் கட்டுப்படும். இந்த நீரில் சில துளிகளைக் கண்ணில்விட்டாலும் கண் நோய் குணமாகும்.

கடுக்காய்ப் பொடியை சம அளவு நெய்யில் வறுத்து, இந்து உப்புடன் கலந்து இரண்டு கிராம் அளவு சாப்பிட்டு வந்தால், வயிற்றுப் புண் குணமாகும்.

கடுக்காயும் காசுக் கட்டியும் சம அளவு எடுத்து அரைத்து, நாக்குப் புண்ணுக்கு தடவினால் குணம் கிடைக்கும்.

பச்சைக் கடுக்காயைப் பாலில் அரைத்துச் சாப்பிட்டால், இருமல், இரைப்பு, ரத்தமும் சீழுமாய் போகும் வயிற்றுக்கடுப்பு, வறட்டு இருமல் ஆகியன குணமாகும்.

கடுக்காய்த் தூளையும் பசு நெய்யையும் சம எடை எடுத்து ஒரு பீங்கான் ஜாடியில் போட்டு ஒரு மெல்லிய துணியால் மூடி 40 நாள் வெயிலில் வைத்து வடிகட்டி 5 முதல் 10 மி.லி. அளவு காலை - மாலை உண்டுவந்தால், மலச் சிக்கல், வயிற்றுப் புண், மூல முளை, பவுத்திரம் போன்ற நோய்கள் தீரும்.

கடுக்காயைத் தட்டித் துணியில் முடிந்து ஆமணக்கு எண்ணெயில் விட்டுச் சூரிய ஒளியில்வைத்து பின் அதைக் கண்களில் பிழிந்தால், மேக நோயில் வரும் கண் நோய், கண் பீளை வடிதல், கண் சிவப்பு நீங்கும். கடுக்காயை நீரில் ஊறவைத்து வடிகட்டிய நீரை வெயிலில் குழம்பாகும் வரை வைத்து 5 முதல் 10 மி.லி. கிராம் அளவு ஒரு நாள்விட்டு ஒரு நாள் உண்டால், இரைப்பை பலப்படுவதோடு நாட்பட்ட மலச் சிக்கலும் தீரும்.

கடுக்காய்ப் பிஞ்சு: ஆமணக்கு எண்ணெயுடன் கடுக்காய்ப் பிஞ்சைச் சேர்த்துக் காய்ச்சி அந்த எண்ணெயை உள்ளுக்கும் வெளியிலும் பயன்படுத்தினால், மலச் சிக்கல், மூலக்கடுப்பு, ஆசனவாய் வெடிப்பு முதலியவை தீரும்.

கடுக்காய்ப் பூ: இதனைப் பொடி செய்து இரண்டு கிராம் நீருடன் அருந்த, கடுப்போடு கூடிய பேதி தீரும். பூவை அத்திமரப் பட்டையுடன் சேர்த்துப் பால்விட்டு அரைத்து இரு வேளை உண்டால், ரத்தமும் சளியும் கலந்த வயிற்றுப்போக்கு மற்றும் பெண்களின் வெள்ளைப்படுதல் பிரச்னை தீரும்.

November 01, 2013

உண்மை ஜிடிபி - பெயரளவு ஜிடிபி என்றால் என்ன? - தி இந்து

நாட்டின் மொத்த உள்நாட்டு உற்பத்தியை(ஜி.டி.பி.) ரூபாய் மதிப்பில் கூறும்போது சந்தை விலையை பயன்படுத்த வேண்டியுள்ளது. உதாரணமாக நேற்று நாட்டில் ஒரு பேருந்து உற்பத்தியானது என்று வைத்துக்கொள்வோம் நேற்று ஒரு பேருந்தின் விலை ரூ.1000 என்றால், நாட்டின் நேற்றைய ஜிடிபி ரூ1,000. இன்று நாட்டில் இரண்டு பேருந்துகள் உற்பத்தி செய்யப்பட்டன.
ஆனால் இன்று ஒரு பேருந்தின் விலை ரூ1500 என்றால் இன்றைய ஜிடிபி (2 X 1500 =3000) ரூ.3,000. இதில் நேற்றைய ஜிடிபி நேற்றைய விலையிலும், இன்றைய ஜிடிபி இன்றைய விலையிலும் கணக்கிடப்பட்டதை நினைவில் வைத்துகொள்க. இவ்வாறு அன்றைய விலையில் ஜிடிபி-யை கணக்கிட்டால் அது “பெயரளவு ஜிடிபி” (Nominal GDP) என்றும் அல்லது “அன்றைய விலையில் ஜிடிபி” (GDP at Current Prices) என்றும் கூறுவர்.
இப்போது நேற்றைவிட இன்று ‘பெயரளவு ஜிடிபி’ ரூ 3,000 உயர்ந்திருக்கிறது. இதற்கு என்ன காரணம்? உண்மையில் உற்பத்தி இரண்டு மடங்காகியுள்ளது, ஆனால், பேருந்தின் விலை 50% உயர்ந்ததினால் ‘பெயரளவு ஜிடிபி’ மூன்று மடங்கு உயர்ந்தது போல் தெரிகிறது.
எனவே, “பெயரளவு ஜிடிபி” உயர்வின் ஒரு பகுதி உற்பத்தி உயர்வினாலும், மற்றொரு பகுதி விலை உயர்வினாலும் என்பதை நாம் புரிந்துகொள்ளவேண்டும்.
உற்பத்தி உயர்வால் ஜிடிபி உயர்ந்தால் மட்டுமே பொருளாதாரம் வளர்ந்ததாக ஒப்புக்கொள்ளமுடியும். எனவே, ‘பெயரளவு ஜிடிபி’ உயர்விலிருந்து விலை உயர்வை பிரித்து எடுக்க வேண்டும். இதனை எவ்வாறு செய்வது? ஒரு வருட உற்பத்தியை பழைய வருட விலையில் பெருக்கினால் இதனை பெறமுடியும்.
மேலே உள்ள உதாரணத்தில், பேருந்தின் நேற்றைய விலை ரூ1,000. இதனுடன் இன்றைய உற்பத்தியான இரண்டு பேருந்தை பெருக்கினால் நமது ஜிடிபி ரூ 2,000 மட்டுமே.
இவ்வாறு பெறபட்ட ஜிடிபி-யை ‘உண்மை ஜிடிபி’ (Real GDP) அல்லது ‘நிலையான விலையில் ஜிடிபி’ (GDP at Constant Prices) என்பர். இங்கு ‘உண்மை ஜிடிபி’ உயர்வு இரண்டு மடங்காகியுள்ளது அதே போல் உற்பத்தியும் இரண்டு மடங்காகியுள்ளதை காண்க. ஆகவே, உற்பத்தி உயர்வை மட்டும் கணக்கிட நமக்கு ‘உண்மை ஜிடிபி’ தேவை.
எல்லா பொருளியல் விவாதங்களிலும் ‘உண்மை ஜிடிபி’ உயர்வை மட்டுமே கணக்கில் எடுத்துக்கொள்வோம். இதன் அடிப்படையில் மட்டுமே ஒரு நாட்டின் பொருளாதார வளர்ச்சி விகிதம் கணக்கிடப்படுகிறது.

ஜிடிபி கணக்கிடும் முறை என்றால் என்ன? - தி இந்து

ஜிடிபி-யைக் கணக்கிடுவது கடினமான காரியம் என்று கூறியிருந்தேன். இன்று ஜிடிபி எப்படிக் கணக்கிடப்படுகிறது என்று பார்ப்போம்.
ஒரு நாட்டில் ஒரு ஆண்டில் உற்பத்தி செய்யப்பட்ட எல்லா பொருட்கள் மற்றும் பணிகளின் (சேவைகள்) ரூபாய் மதிப்பு ஜிடிபி என்று தெரியும். ஒவ்வொரு பொருளின் விலையை அப்பொருள் உற்பத்தி அளவுடன் பெருக்கினால் நமக்கு அப்பொருளின் மொத்த உற்பத்தி மதிப்பு தெரிந்துவிடும்.
இது மிக எளிய முறை, இவ்வாறே எல்லா பொருட்கள், பணிகளின் மொத்த உற்பத்தியை கணக்கிட்டு ஜிடிபி-யைக் கணக்கிடலாம். ஆனால், பல பொருட்களின் சந்தை விலைகள் நமக்குத் தெரிவதே இல்லை. எனவே, மூன்று வழிகளில் உற்பத்தி அளவைக் கணக்கிடுகிறோம்.
ஒன்று, ஒரு பொருளை உற்பத்தி செய்யும்போது எவ்வளவு மதிப்பு கூட்டப்பட்டுள்ளது என்று கணக்கிடுவது. உதாரணமாக, ஒரு தச்சன் ஒரு மர நாற்காலி செய்தால், அவர் அம்மரத்திற்கு மதிப்பு கூட்டியுள்ளார் என்று அர்த்தம். எனவே நாற்காலியின் மதிப்பில் மரத்தின் மதிப்பை கழித்தால் தச்சன் கூட்டிய மதிப்பு தெரியும்.
இவ்வாறு உற்பத்தி மதிப்பைக் கணக்கிடலாம். இரண்டு, சில பொருட்களை பெற நாம் செய்யும் செலவின் அடிப்படையில் அப்பொருளின் உற்பத்தி மதிப்பைக் கணக்கிடுவது.
கல்விக்காக நாம் செலுத்தும் கட்டணம் அக்கல்வி பணியின் உற்பத்தி மதிப்பாகக் கொள்ளலாம். மூன்று, ஒரு பொருள் உற்பத்தியினால் அதில் ஈடுபட்ட பலருக்கு வருமானம் போய் சேரும், அந்த வருமானங்களை தொகுத்து உற்பத்தி மதிப்பு கணக்கிடப்படும்.
எல்லா பொருளாதாரங்களிலும் பொருளுக்கு ஏற்றவாறு இந்த மூன்று முறைகளில் ஏதாவது ஒன்று பயன்படுத்தபட்டு ஜிடிபி யை கணக்கிடுகிறோம்.
நம் பொருளாதாரத்தில் பல பொருட்கள் சந்தைக்கு வராமலே உள்ளன. உதாரணமாக, பெண்கள் வீட்டில் செய்யும் வேலைகள் சந்தைபடுத்தபடாமல் போவதால் அச்சேவைகள் நம் ஜிடிபி யில் சேருவதே இல்லை. பண்டமாற்று முறையில் பரிவர்த்தனை நடைபெறும் போதும் இதே சிக்கல் தான்.

மேற்கத்திய மருந்துகள் - மறுக்க முடியாத சில உண்மைகள் - தி இந்து

சுஷில் குமார் அறிவியல் மற்றும் தொழிலக ஆய்வு மன்றத்தில் (சி.எஸ்.ஐ.ஆர்.) என்னுடன் வேலை பார்த்தவர். நீரிழிவு நோயால் துன்பப்பட்டுக்கொண்டிருந்தவர், பாபா ராம்தேவ் சொன்னார் என்று சுரைக்காய்ச் சாற்றைத் தினமும் குடித்துக்கொண்டிருந்தார். ராம்தேவ் சொல்லாதது, சில சமயம் சுரைக்காய் சாறு விஷமாக ஆகக் கூடும் என்பது. ஒரு நாள், சாறு குடித்த சில மணி நேரங்களில் நண்பர் மரணத்தைச் சந்தித்தார். இந்தியா முழுவதும் பேசப்பட்ட மரணம் அது. அறிவியல் துறையைச் சார்ந்தவர்கள்கூட இந்திய மருத்துவ முறைகளின் மீது எவ்வளவு மாளாத, அறிவுபூர்வமற்ற பற்று கொண்டுள்ளனர் என்பதற்கு ஓர் உதாரணம் இது.
நான் இவ்வாறு சொல்வதால், பழைய மருத்துவ முறைகளையோ அவை பரிந்துரைக்கும் மருந்துகளையோ முழுவதுமாக நிராகரிக்கிறேன் என்று அர்த்தமல்ல. நமது பாரம்பரிய மருந்துகள், மருத்துவ முறைகள் சிறந்தவை. அதேசமயம், அவற்றால் தீதற்ற நன்மை மட்டுமே விளையும் என்ற முன்முடிவோடு அவற்றை அணுகுவது அறிவுபூர்வமான செயலாகாது. நமது மூதாதையர்கள் தந்தவை என்பதால் அவை கடவுளர் நிலையினை அடைந்துவிட்டன, அவற்றைக் கேள்விகளுக்கு உட்படுத்தக் கூடாது என்று கருதுவது அபாயகரமானது. மேற்கத்திய மருத்துவ முறையின்படி, ஒரு மருந்து மக்களைச் சென்றடைவதற்கு முன்னால் என்னென்ன சோதனைகளுக்கு உட்படுத்தப்படுகின்றனவோ அதே சோதனைகளுக்கு இந்திய மருத்துவ முறைப்படி பரிந்துரைக்கப்படும் மருந்துகளும் உட்படுத்தப்பட வேண்டும் என்பது எனது கருத்து.
மேற்கத்திய மருத்துவ முறை என்றால் என்ன?
மேற்கத்திய மருத்துவ முறைகளும் மருந்துகளும் அறிவியல் அணுகுமுறையை அடிப்படையாகக் கொண்டவை. அறிவியல் அணுகுமுறைஎன்றால் என்ன என்பதை எனக்கு இந்தியாவின் புகழ்பெற்ற அறிஞரான நர்லீகரைச் சந்தித்தபோது தெளிவாக விளக்கினார். கோட்பாடு, சோதனை, கண்டறிதல் ஆகிய மூன்றையும் உள்ளடக்கிய செயல்பாடு இந்த அணுகுமுறை. இது படைப்பின் முழு ரகசியங்களையும் நமக்குக் காட்டும் திசையை நோக்கிச் செல்லும், முடிவே இல்லாத சுழற்படிக்கட்டு போன்றது. பயணத்தின்போது இடர்களும் சறுக்கல்களும் ஏற்படலாம். இந்தப் பாதை முழுவதும், தவறான சோதனைகள், பிழையான கண்டறிதல்கள் போன்றவற்றின் எச்சங்கள் சிதறிக்கிடக்கின்றன என்பதை ஒப்புக்கொள்பவர்களின் முதல் வரிசையில் விஞ்ஞானிகள் இருப்பார்கள்.
உதாரணமாக, ரத்தம் உடலினுள் கடல் நீரைப் போல விரிவதும் சுருங்குவதுமாக இருக்கும் என்று மேற்கில் நினைத்த காலம் ஒன்று இருந்தது.முன்னோடிகளில் ஒருவரான கேலன் அவ்வாறுதான் நினைத்தார். கல்லீரல் ரத்தத்தை உற்பத்தி செய்கிறது, அதைத் திசுக்கள் உண்கின்றன என்று அவர் சொன்னார். ரத்த ஓட்டம் என்றால் என்ன என்பதை முதலில் உணர்ந்தவர் இபின் அன் நஃபீஸ் என்ற பதின்மூன்றாம் நூற்றாண்டில் வாழ்ந்த எகிப்திய விஞ்ஞானி. ஆனால், பல சோதனைகள் செய்து ரத்தம் எவ்வாறு உடலில் ஓடுகிறது என்பதை நமக்குக் காட்டியவர் ஹார்வி. கேலன் சொன்னதெல்லாம் சரி என்று அவர்கள் ஏற்றுக்கொள்ளத் தயாராக இல்லை. இந்தச் சுதந்திரம் அவர்களுக்கு இருந்ததால்தான் மேற்கத்திய அறிவியலும் மருத்துவமும் முன்னேற முடிந்தது.
வரலாற்றைப் புதைக்க முடியாது
மேற்கத்திய மருந்துகளைப் பற்றிக் குறை கூறுபவர்கள், அதனால் உலகுக்கு ஏற்பட்ட நன்மைகளைப் பற்றிப் பேசவே மாட்டார்கள். பென்சிலின் கண்டுபிடிக்கப்படவில்லை என்றால், இன்று உலகில் இருப்பவர்களில் 75% உயிரோடு இருக்க மாட்டார்கள். 20ம் நூற்றாண்டின் தொடக்கத்தில் இந்தியக் குடிமகனின் சராசரி ஆயுள்காலம் சுமார் 22 வயதுதான் என்பதை நாம் நினைவில் கொள்ள வேண்டும். இன்று சுமார் 66 வயது என்றால் அதற்கு முக்கியமான காரணம், மேற்கத்திய மருந்துகள். அம்மையும் ப்ளேக்கும் போலியோவும் முழுவதுமாக மறைந்துவிட்டன. காலரா, காசநோய் என்றாலே மரணம்தான் என்ற நிலை மாறிப் பல நாட்கள் ஆகிவிட்டன. தலைவலிக்கு உடனே நிவாரணம் ஆஸ்பிரினும் பாரஸடமாலும் தருகின்றன. வலியே தெரியாமல் அறுவைச் சிகிச்சை நடக்கிறது. இன்சுலின், சர்க்கரை நோய் உள்ளவர்களுக்குப் பேருதவிசெய்கிறது. மனநோயாளிகளுக்கு தோரஸைன் ஒரு வரம் என்றுதான் சொல்ல வேண்டும். எல்லாவற்றுக்கும் மேலாக, கர்ப்பத்தடை மாத்திரை கண்டுபிடிக்கப்பட்டது பெண் விடுதலைக்கு முக்கியமான காரணங்களில் ஒன்று.
இந்த வெற்றிகளுக்குக் காரணம், மேற்கத்திய மருந்துகள் கடும் சோதனைகளுக்குப் பிறகே மக்களைச் சென்றடைகின்றன என்பதுதான். ஒரு புது மருந்து, கண்டுபிடிக்கப்பட்ட நாளிலிருந்து சந்தையை அடைவதற்கு 12 ஆண்டுகள் எடுக்கின்றன. கண்டுபிடிக்கப்பட்ட மருந்துகளில் 5,000-ல் ஒன்றே எல்லாச் சோதனைகளையும் கடந்து சந்தையை அடைகிறது. அடைந்த மருந்துகளும் சில சமயங்களில் திரும்பப் பெறப்பட்டு மறுசோதனைக்கு உட்படுத்தப்படுகின்றன. பெரு நிறுவனங்கள் செய்யும் தகிடுதத்தங்களையும் மீறி உயிர் காப்பாற்றும் மருந்துகள் பல மக்களைச் சென்றடைந்திருக்கின்றன.
இத்தகைய சோதனைகளைப் பாரம்பரிய மருந்துகள் கடந்துவந்திருக்கின்றனவா என்ற கேள்விக்கு, இல்லை என்பதுதான் பதில். அஸ்வகந்தா மூலிகையின் பயன்களைப் பற்றி பல ஆய்வுகள் நடந்துவிட்டன. ஆனால், இதுவரை உருப்படியான ஒரு மருந்துகூட வரவில்லை. மேற்கத்திய வழிமுறைகளை ஏன் கடைப்பிடிக்க வேண்டும், எங்களுக்கு என்று தனி வழிமுறை இருக்கிறதே என்று ஓர் ஆயுர்வேத மருத்துவர் கேட்கலாம். தவறேயில்லை. ஆனால், எந்த வழிமுறை இருந்தாலும் அது வல்லுநர்களால் ஏற்றுக்கொள்ளப்பட வேண்டும். ஏன் இதுவரை ஏற்றுக்கொள்ளப்படவில்லை என்பதற்குச் சரியான பதில் மருத்துவர்தான் சொல்ல வேண்டும். சதி, சூழ்ச்சி என்று சொல்லித் தப்பித்துக்கொள்ள முயற்சி செய்யக் கூடாது.
இது நாட்டுப் பற்று சார்ந்ததல்ல. மனித உயிர் சார்ந்தது. உடல்நலம் சார்ந்தது.
பி.ஏ. கிருஷ்ணன், எழுத்தாளர் - தொடர்புக்கு: tigerclaw@gmail.com

அறிவியல் அடிப்படையற்றதா பாரம்பரிய மருத்துவம்? - தி இந்து

எழுத்தாளர் பி.ஏ.கிருஷ்ணன் தன்னுடைய ‘மேற்கத்திய மருந்துகள் - மறுக்க முடியாத சில உண்மைகள்’ கட்டுரையில் (‘தி இந்து’அக்.29) நவீன மருத்துவத் துறையின் சில பக்கங்களை வாசகர்களுக்குச் சொல்லி, பாரம்பரிய மருந்துகள் இன்றைய அறிவியலின் கேள்விகளுக்குப் பதிலளிக்காதவை என்ற உண்மைக்குப் புறம்பான குற்றச்சாட்டை, தவறான தரவுகளுடன் நிறுவ முயன்றிருக்கிறார்.
நவீன மருந்துகளின் மகத்துவத்தையும் நம் மக்கள் நலவாழ்வுக்கு அவற்றின் பங்களிப்பையும் ஒருபோதும் யாராலும் மறுக்கவோ மறக்கவோ இயலாது. தொற்றுநோய்க் கூட்டத்தைப் பெருவாரியாகக் கட்டுப்படுத்தியதிலும் சரி, அவசர காலச் சிகிச்சையில் அதன் முக்கியத்துவமும் சரி அளப்பரியன. அதேசமயம், பாரம்பரிய மருத்துவ அறிவியலும் அதன் புரிதலும் இதுவரை நம்மை, நம் நலவாழ்வைக் காத்துவந்தன என்பதை மறந்து, ஏதோ பாரம்பரிய மருத்துவம் ‘குறளி வித்தை’என்ற ரீதியில் எழுதுவது, ஏகோபித்த அளவில் சித்தமருத்துவத்தின் மீது நம்பிக்கை கொண்டுள்ள மக்களுக்கு ஏமாற்றத்தையும் வேதனையையும் அளிக்கும்.
நோய்கள் எல்லாம் கர்மவினையினால், அமானுஷ்ய சக்தியினால் ஏற்படுகின்றன என கிரேக்கம் உள்ளிட்ட உலகின் முன்னோடிச் சமூகங்கள் பேசிவந்த காலத்திலேயே, நோய்களுக்கு எந்தக் கர்மவினையும், பேய் பிசாசும் காரணமல்ல; உடலில் மாறுபாடு அடைந்துள்ள முக்குற்றங்களாலான வளி, அழல், ஐயம் ஆகிய மூன்றும்தான் காரணம் என்றார் வள்ளுவர் (‘மிகினும் குறையினும் நோய்செய்யும் மேலோர் வளிமுதலா எண்ணிய மூன்று’ - திருக்குறள் 941).
பஞ்ச பூதங்களான மண், நீர், காற்று, தீ, ஆகாயத்தின் கூட்டுறவில், இனிப்பு, கார்ப்பு, கசப்பு, புளிப்பு, துவர்ப்பு, உப்பு ஆகிய ஆறு சுவைகள் தோன்றி, அந்த ஆறு சுவைகளால் ஆன உணவைச் சாப்பிடும்போது, சாப்பிடும் சுவைக்கு ஏற்றபடி, மூன்று குற்றங்களும் மாறுகின்றன என்ற புரிதலில்தான் சித்த மருத்துவமும், ஆயுர்வேதமும் இன்ன பிற இந்தியப் பாரம்பரிய மருத்துவ முறைகளும் இயங்குகின்றன. இது ஒரு பண்டைய புரிதல். தெளிவான ஓர் அறிவியல். தற்கால அறிவியலின் தர்க்கவாதப்படி துல்லியமானது (ப்ரேசிஸ்டு), பாரபட்சமற்றது (டிஸ்பாஷனேட்), தர்க்கரீதியிலானது (ரேஷனால்), தேவைப்படும் விளைவை எப்போதும் தரக்கூடியது (ரீபுரொடியூசபில் கான்டெக்ஸ்ட்).
பல காலம் இந்தப் புரிதலை அறிவியலாக ஏற்றுக்கொள்ள நவீன அறிவியலால் முடியவில்லை. ஆனால், வெகு சமீபத்தில் தன் ஆய்வுக் கண்களை அகலமாக விரித்து, சித்த மருத்துவமும் ஆயுர்வேதமும் சீன மருத்துவமும் சொல்லிவரும் ‘பிரக்ருதி’(வாத பித்த கப உடல்வாகுகள்) சரிதான் என்றும், ஒவ்வோர் உடலுக்கேற்ற மருந்தையும் படைத்தாக வேண்டும் என்றும் நவீன மருத்துவ உலகின் மரபணு மருந்தறிவியல் (ஜினோஃபார்மசூட்டிக்ஸ்) துறை சொல்ல ஆரம்பித்திருக்கிறது. அந்த மரபணுவியல் (ஜினோமிக்ஸ்) அடிப்படையில், ஏதாவது புது மருந்து அஸ்வகந்தாவில் வந்திருக்கிறதா என அறியாமையில் கேட்ட கட்டுரை ஆசிரியருக்கு, வெகு சமீபத்தில் அஸ்வகந்தாவுக்குத் தடுப்பு மருந்துக்கான துணை மருந்துக்கான (நியூ வேக்சின் அட்ஜுவண்ட்) அமெரிக்கக் காப்புரிமைகூட வழங்கப்பட்டிருப்பது தெரிந்திருக்க வாய்ப்பில்லை. அஸ்வகந்தா எந்த அளவில் வேலை செய்யும், எவ்வளவு சரியான மருந்து எனச் சொல்லும் 697 ஆய்வுக் கட்டுரைகள் இருப்பதாவது அவருக்குத் தெரியுமா?
சித்த, ஆயுர்வேத, யுனானி மருந்துகள் எல்லா வல்லுநர்களுக்கும் பதில் சொல்லும்படியான ஆய்வுகளுக்கு உட்படுத்தப்படுவதில்லை என்ற பிம்பத்தைக் கட்டுரையாசிரியர் எழுப்ப முயல்வதும் கண்டனத்துக்குரியது. மத்திய அரசின் ‘ஆயுஷ்’ துறைக்குக் கீழ் இயங்கும் சித்த, ஆயுர்வேத, யுனானி ஆணையங்கள் தத்தம் மருத்துவத் துறையின் மருந்துகளுக்கான தர நிர்ணயங்களை இன்றைய அறிவியல் கூறுகளின்படி நிர்ணயித்து, சித்த மருத்துவ மருந்தறிவியல் நூல், ஆயுர்வேத மருத்துவ மருந்தறிவியல் நூல், யுனானி மருத்துவ மருந்தறிவியல் நூல் ஆகிய நூல்களைக் கொண்டுவந்து, மருந்துகளின் தரக் கட்டுப்பாட்டையும், மருந்துத் தயாரிப்பின் தர மேம்பாட்டையும் கொண்டுவந்திருக்கின்றன.
சித்த, ஆயுர்வேத மருந்துகள் வாதத்தைக் குறைக்கக் கூடியவையா, வலி நிவாரண வழிமுறையா (காக்ஸ்-2 இன்ஹிபிட்டர்) என்ற ரீதியிலான ‘இரட்டை ஆய்வுகள்’ இந்தியாவெங்கும் நடைபெற்றுவருகின்றன. புற்றின் வளர்ச்சியைத் தடுக்கும் என்று கண்டறியப்பட்ட மஞ்சளும் வெண்கொடிவேலியும் நவீன மருத்துவப் புரிதல் அடிப்படையிலான ‘பி-53’ மரபணு வெளிப்பாட்டில் (பி-53 ஜீன் எக்ஸ்பிரெஷன்) எவ்விதம் பணிபுரியும் என்பதும், தீர்மானிக்கப்பட்ட செல் மரணத்தை (அப்போப்டோஸிஸ்) எவ்விதத்தில் ஊக்குவிக்கும் என்பதையும் கண்டறிந்து, உயர் மதிப்பீட்டுப் பன்னாட்டு மருத்துவ ஏடுகள் வெளியிட்டு வெகு காலம் ஆயிற்று.
சமீபத்தில், ஒட்டுமொத்தத் தமிழகமே பயந்துபோன சிக்குன் குனியாவையும் டெங்குவையும் நிலவேம்புக் குடிநீர் கட்டுப்படுத்தியதையும் அடுத்தகட்டமாக நிலவேம்பின் ஆண்ட்ரொக்ராஃபைனும் பானிகுலேட்டும் எப்படி வைரஸைக் கட்டுப்படுத்துகின்றன என்ற ஆய்வு தொடங்கியதையும் ஒட்டுமொத்த மருத்துவ உலகமும் அறியும்.
கேலன் சொன்னதையும் கலிலியோ சொன்னதையும் மறுத்துப் பின்னூட்டம் தரும் ஆய்வுகள்தாம் மேற்கத்திய மருத்துவ வளர்ச்சிக்கு வித்து என்று வாதாடும் கட்டுரையாசிரியர், “இந்தப் பழம் ஏன் மேலே போகாமல் கீழே வருகிறது?” என்ற நியூட்டனின் சிந்தனையிலும் சரி, “கறந்த பால் முலை புகா; கடைந்த வெண்ணெய் மோர் புகா; விரிந்த பூ, உதிர்ந்த மலர் மரம் புகா” என எழுதிய சிவவாக்கியரின் சிந்தனையிலும் சரி; அறிவியல்தான் அடித்தளத்தில் இருக்கிறது என்பதை மறுப்பாரா?
அன்று மதச் சித்தாந்தத்துக்குள் மாட்டிக்கொள்ள மறுத்த நியூட்டனும், ‘நட்ட கல்லும் பேசுமோ?’ என்ற சிவவாக்கியரும் ஒரே புள்ளியில்தான் அறிவியலைப் பார்த்தனர். மேற்கில் நியூட்டனுக்கும் டார்வினுக்கும் அவர்தம் அறிவியலுக்கும் கிடைத்த அங்கீகாரம், அதே தேடலை வேறோர் அறிவியல் புரிதலுடன் இன்னும் பல நூறு ஆண்டுகள் முன்னரே சொன்ன ஆசிவகக் கணியனுக்கோ வள்ளுவனுக்கோ சிவவாக்கியருக்கோ கிடைக்கவில்லை. பாரம்பரிய அனுபவங்களைக் கட்டவிழ்க்க, பாரபட்சமற்ற பாரம்பரிய மருத்துவப் புரிதலும் வேண்டும்; நவீன விஞ்ஞான ஆய்வுகளும் வேண்டும். இரண்டில் எது குறைந்தாலும் விடை கிடைக்காது. இங்கே முட்டுக்கட்டையாக இருப்பது இரண்டின் ஒருங்கிணைந்த பார்வையும் இல்லாததுதான். கூடவே, ‘தான் மட்டும்தான்’, ‘நானே கடவுள்’, ‘பழசு புரட்டு எனும் பார்வை’, ‘காப்புரிமை’ என்ற கட்டமைப்புக்குள் சிக்கியுள்ள மருத்துவ உலகம்.
ஒருவரை ஒருவர் குறை சொல்லாமல், இன்னும் தினசரி காலையில் ஏராளமாய் மருத்துவமனையின் வாசலில் குத்தவைத்துக் காத்திருக்கும் நம் ஊர் விளிம்பு நிலை சாமானியர்களுக்கும் நலவாழ்வைத் தருவதற்கு, காய்த்தல் உவத்தல் இல்லாத பார்வையில் ஒருங்கிணைந்த ஆய்வாலும் சிகிச்சையாலும் மட்டும்தான் முடியும்!
- கு.சிவராமன், மருத்துவர், சமூகச் செயல்பாட்டாளர் - தொடர்புக்கு: herbsiddha@gmail.com

இது ஆண்களுக்கான சமையல் குறிப்பு - தி இந்து

மனம் விரும்பி, இது என் வேலை என மனம் ஒப்பிச் சமைக்க வரும் ஆண்கள் அன்றாடம் சந்திக்கும் ஒரு பிரச்னை/கேள்வி இன்றைக்கு என்ன குழம்பு வைப்பது, என்ன காய் சமைப்பது என்பதுதான். ஆயிரக்கணக்கான ஆண்டுகளாக நம் பெண்கள் சந்தித்துவரும் கேள்விதான் இது. நூற்றுக்கணக்கான குழம்புகள் அறிந்த பாட்டிமார்கள் இப்போது நம்மோடு இல்லை. இங்குதான் சமையல் குறிப்புப் புத்தகங்கள் நமக்குக் கை கொடுக்கும்.
என் சமையல் அனுபவத்தில் நான் சொல்ல விரும்புவது என்னவெனில் நாமே செய்து பார்த்து புதிய குழம்பு வகைகளை உருவாக்கி இச்சமூகத்துக்கு அர்ப்பணம் செய்ய வேண்டும். ஆண்கள் அறிந்துகொள்ள வேண்டியது எல்லாக் குழம்புகளுக்குமான சில அடிப்படைகளைத்தான். உப்பு+புளிப்பு+உரைப்பு -இந்த மூன்றுதான் எல்லா வகைக் குழம்புக்கும் அடிப்படை. இவை மூன்றும்போக ஒவ்வொரு வகைக் குழம்புக்கும் என சில பலசரக்கு வகைகள் மட்டும் சேர்க்க வேண்டும். அவ்வளவுதான்.
சாம்பாரை விட்டால் சைவத்தில் அடுத்த இடத்தில் நிற்பது புளிக்குழம்புதான்.ஓட்டல்களில் வைக்கும் வத்தக்குழம்பு என்பது வேறு.
முதலில் ஒரு கிண்ணத்தில் சிறிய எலுமிச்சை அளவு புளியை ஊற வைத்துக்கொள்ள வேண்டும். கத்தரிக்காய் நாலு,முருங்கைக்காய் ஒன்று,தக்காளி இரண்டு இவற்றைக் கழுவி நறுக்கி வைத்துக்கொள்ள வேண்டும். நறுக்கிய பிறகு கழுவாமல், கழுவிய பிறகு நறுக்குவதுதான் சரி. காய்களில் உள்ள நீர்ச்சத்து வீணாகாமல் இருக்கும்.
புளிக்குழம்புக்கான மசாலாவுக்கு முதலில் மல்லி விதை, சீரகம், சிறிது கடலைப்பருப்பு, ஆறு அல்லது ஏழு மிளகாய் வத்தல், பூண்டு 4 பல் இவற்றைத் தனித்தனியாக வறுத்து (சிவக்க) எடுத்துக்கொள்ள வேண்டும். ஒவ்வொன்றும் வறுபடும் தன்மை வேறானது என்பதால் தனித்தனியாக வறுக்கிறோம். நாலு சின்ன வெங்காயத்தைத் தோல் நீக்கி எடுத்துக்கொள்ள வேண்டும். இவற்றை அம்மியில் வைத்து நீர் சேர்த்து (அல்லது மிக்ஸியில் போட்டு) நன்றாக அரைத்துக்கொள்ள வேண்டும். ஒரு தேங்காய்ச்சில்லு இப்போதே சேர்த்து அரைக்கலாம். அல்லது தனியாக அரைத்துக் கடைசியில் குழம்பில் சேர்க்கலாம்.
இப்போது ஊறவைத்த புளியைக் கரைத்து குழம்புச்சட்டியில் ஊற்றி, நறுக்கிய காய்களையும் போட்டு அரைத்த மசாலாவையும் சேர்த்து, தேவையான அளவு தண்ணீரும் உப்பும் சேர்த்து மூடி அடுப்பில் வைத்து வேக விடவேண்டும்.காய்கள் வெந்து விட்டதை அவ்வப்போது திறந்து பார்த்துக்கொள்ள வேண்டும். தக்காளி குழைந்து விட்டதைப் பார்த்தாலே வெந்ததை அறியலாம். இது போகப்போகப் பழகிவிடும். வாசனையை வைத்தே வெந்ததை அறிய காலப்போக்கில் நம் மூக்கும் பழகிவிடும். உப்பு கம்மியாகப் போட்டதைக்கூட வாசனையால் அறிந்து கொள்ள மூக்கு பயிற்சி எடுத்துவிடும்.
பிறகென்ன? சாம்பாருக்குச் சொன்னதுபோல தாளித்து, தாளிதத்தைக் குழம்பில் கொட்டி இறக்கிவிட வேண்டியதுதான். புளிகுழம்பு தயார்.
மசாலாவை தண்ணீர் சேர்க்காமல் நல்லெண்ணெயில் வதக்கி அதோடு நறுக்கிய காய்களையும் போட்டு வதக்கி அப்புறம் புளிக்கரைசலை ஊற்றி உப்பும் தண்ணீரும் சேர்த்து இதே குழம்பை தயாரித்தால் வேறு ருசி வரும்.
இந்த மசாலாவோடு பெருஞ்சீரகம் சேர்த்து அரைத்தால் அது ஒரு ருசி. கசகசா சேர்த்தால் அது ஒரு ருசி. இப்படி இன்னும் ஏதாவது சேர்த்தும் குறைத்தும் புதிய வகைகளை நாம் உருவாக்கலாம்

தனிநபர் ஜிடிபி என்றால் என்ன? - தி இந்து

தனிநபர் ஜிடிபி என்றால் என்ன? - தி இந்து

தனிநபர் ஜிடிபி (Per Capita GDP)
உலக நாடுகளை ஜிடிபி-யின் படி வரிசைப்படுத்தினால் இந்தியா ஒன்பதாவது இடத்தில் உள்ளது, பத்தாவது இடத்தில ரஷியாவும், பதினொன்றாவது கனடா, பன்னிரண்டாவது ஆஸ்திரேலிய என உள்ளது நமக்கெல்லாம் தெரியும். இந்தியாவைவிட ரஷியா, கனடா, ஆஸ்திரேலியா ஆகிய மூன்று நாடுகளும் பொருளாதாரத்தில் முன்னேறிய நாடுகள் என்று. ஆக, ஜிடிபியை அடுத்து பொருளாதார முன்னேற்றத்தை அறிய நமக்கு வேறு ஒரு புள்ளிவிபரம் தேவைப்படுகிறது, அது தான் தனிநபர் ஜிடிபி.
லதா, மீனா ஆகிய இருவரின் குடும்பங்கள் ஒவ்வொன்றும் ரூ. 10,000 மாத வருமானம் பெறுகின்றன. இரு குடும்பங்களும் ஒரே பொருளாதார நிலையில் உள்ளனவா? லதா குடும்பத்தில் நான்கு நபர்கள், ஒவ்வொருவரும் சராசரியாக ரூ. 2,500 பெறுகின்றனர். மீனா குடும்பத்தில் ஐந்து நபர்கள், ஒவ்வொருவரும் சராசரியாக ரூ. 2,000 பெறுகின்றனர். சராசரி வருமானத்தை கணக்கிட்டால் பொருளாதாரத்தின் உண்மை நிலை தெரியவருகிறது. சராசரி வருமானத்தை எவ்வாறு கணக்கிட்டோம் மொத்த வருமானத்தை குடும்ப நபர்களின் எண்ணிக்கையால் வகுத்தால் சராசரி வருமானம் கிடைக்கும். இது போல, ஒரு நாட்டின் ஜிடிபியை அந்நாட்டின் மக்கள் தொகையால் வகுத்தால் தனிநபர் ஜிடிபி (Per Capita GDP) கிடைக்கும்.